?‍♂مشاهد هولندية : مجرد اختلاف ثقافات

لما كنا بسوريا عجزت مرتي وهيي تطلب شراء سيارة وأنا ماني مقتنع

0
450

لما كنا بسوريا عجزت مرتي وهيي تطلب شراء سيارة وأنا ماني مقتنع , بعدين من ضغط الناس وخاصة المرضى يللي بينظرو باستهتار للطبيب يللي ما عندو سيارة رحت اشتريت سيارة متواضعة (شام) مشان أخلص من النق .
سكتو المرضى بس هالمرة الدكاترة رفقاتي عجزوني : مو عيب عليك سيارتك شام ؟ وين عم تروح بالمصاري ؟ احترم حالك واشتري عالأقل ( كيا ريّو ) وأنا كل ما انطعجت من دكتور كنت قلو : سيارة شام ركبها السيد الرئيس , يقوم ينسد وما يعود يفتح تمو .
هون بهولاندا الكل عالبسكليت وأنا من الجملة وما حدا بيطلع بحدا , يعني فعلا خلصنا من البوزات والمظاهر والتشاوف , واليوم بالذات معلمتنا طلعت عالطاولة مشان تكتب عاللوح … إي نعم شلحت من إجرا عيب منكم ونطت عالطاولة … ولو هالحادثة صارت بسوريا كان أخوها أكل هوا , لأنو رح يضلو العمر كلو يعيروه ويقولولو : يا أخو الحفيانة .

بقلم الدكتور سليم بشارة